கோலிவுட் வட்டாரத்தில் தற்போது உச்சக்கட்ட எதிர்பார்ப்பை கிளப்பியுள்ள திரைப்படம் சூப்பர்ஸ்டார் ரஜினிகாந்தின் ‘தலைவர் 173’ (Thalaivar 173). உலகநாயகன் கமல் ஹாசனின் ராஜ் கமல் ஃபிலிம்ஸ் இன்டர்நேஷனல் (RKFI) தயாரிப்பில், அஸ்வத் மாரிமுத்து இயக்கத்தில் உருவாகி வரும் இத்திரைப்படம் குறித்து தற்போது ஒரு மாஸான எக்ஸ்க்ளூசிவ் அப்டேட் வெளியாகியுள்ளது.
இத்திரைப்படத்தில் காமெடி கிங் மற்றும் முன்னணி நாயகனான சந்தானம் ஒரு மிக முக்கியமான முதன்மை கதாபாத்திரத்தில் (Key Role) நடிக்க ஒப்பந்தமாகியுள்ளார்.
சூப்பர்ஸ்டார் ரஜினிகாந்த் மற்றும் சந்தானம் இருவரும் நீண்ட இடைவெளிக்குப் பிறகு மீண்டும் திரையில் கைகோர்க்கவுள்ளனர். ஆரம்பகாலத்தில் ரஜினியின் ‘எந்திரன்’, ‘லிங்கா’ போன்ற படங்களில் ரஜினியுடன் இணைந்து சந்தானம் செய்த காமெடி கலாட்டாக்கள் ரசிகர்கள் மத்தியில் இன்றுவரை பிரபலம். தற்போது மீண்டும் இந்த வெற்றிக்கூட்டணி ‘தலைவர் 173’ படத்தின் மூலம் இணைந்திருப்பது ஒட்டுமொத்த கோலிவுட் மற்றும் ரசிகர்களிடையே பெரும் உற்சாகத்தை ஏற்படுத்தியுள்ளது.
இத்திரைப்படம் வரும் 2027 பொங்கல் பண்டிகையை முன்னிட்டு திரைக்கு வர திட்டமிடப்பட்டுள்ளது. சென்னையில் பிரம்மாண்ட செட்கள் அமைக்கப்பட்டு, முதற்கட்டப் படப்பிடிப்பிற்கான பணிகள் மும்முரமாக நடைபெற்று வரும் நிலையில், சந்தானத்தின் இந்த அதிரடி என்ட்ரி படத்திற்கான எதிர்பார்ப்பை இரட்டிப்பாக்கியுள்ளது. இதுகுறித்த அதிகாரப்பூர்வ அறிவிப்பை படக்குழு விரைவில் வெளியிடும் என எதிர்பார்க்கப்படுகிறது.
